Pakistan ka Sri Lanka ke liye bheja gaya humanitarian aid ka mission aik aham rukawat ka shikar hua jab India ne Pakistani aircraft ko apni airspace se guzarne ki ijazat dene se inkar kar diya. Sri Lanka ko Cyclone Ditova ne 28 November ko sakht nuqsan pohanchaya, jiss ke natijay mein kayi afraad jaan se gaye, bohot se zakhmi huay aur lakhon log be ghar ho gaye. Is emergency surat-e-haal mein Pakistan ki hukoomat ne poori hamdardi ka izhar kiya aur PM ke saath Field Marshal Syed Asim Munir ne hidayat di ke Sri Lanka ko har mumkin sahulat aur madad faraham ki jaye. Pakistan Army ka 45-member Urban Search and Rescue team, NDMA aur Pakistan Air Force ke ta‘awun se C-130 par rawangi ke liye tayyar tha. Yeh wohi team hai jis ne Türkiye mein behtareen performance dikhayi thi.
Pakistan Forced to Send Relief Supplies by Sea, Delaying Arrival by Eight Days
Lekin Indian hukoomat ke airspace denial ne is tamam operation ko rok diya. Humanitarian mission ko rokne se Pakistan ko lambi, ghair-seedhi routes dhoondhna par gaye, jiss se madad pohanchane ka waqt zyada barh gaya. Sirf military aircraft hi nahi, balkeh wo commercial cargo flights bhi mutasir hue jinn par 100 tonnes relief goods bhejne ka plan tha, kyunke woh bhi Indian airspace ka istemaal karte hain. Ab yeh rescue boats, pumps, jackets, tents, blankets, doodh, ghizaayi samaan aur dawaaiyon par mushtamil shipment samandar ke raaste se bhejni par rahi hai, jiss ko Sri Lanka tak pohanchne mein takreeban (8 Days) aath din lag jayenge. Is dauraan Pakistan Navy ka PNS Saif, jo Colombo mein maujood tha, ne ground par relief efforts shuru kar di hain.
Pakistan Offers Unwavering Support to Sri Lanka in This Difficult Moment
Pakistan ne bawajood in rukawaton ke, Sri Lanka ki madad jari rakhne ka azm dohraya hai. India ka humanitarian haul mein airspace rokna Pakistan ki taraf se ghair-ta‘awuni qadam samjha ja raha hai. Former ambassador Asif Durrani ne bhi is faisle ko “petty behaviour” qarar diya aur yaad dilaya ke Nepal ki madad ke waqt bhi India ne aisa hi rawayya ikhtiyar kiya tha, jabke Pakistan ne hamesha humanitarian cause ke liye raaste asaan kiye, jaise Afghanistan ke liye Indian wheat ka land route allow karna.
Sri Lanka Faces Worst Flooding in a Decade as Cyclone Ditwah’s Toll Rises
Is sab ke darmiyan Sri Lanka mein Cyclone Ditwah ne qareeban das saal ka sab se bara saylabi nuqsan paida kiya. 355 log ja bahak ho chuke hain, 366 la pata hai aur hilly ilaqon mein landslides ne surat-e-haal aur bhi sangin bana di. Aadhy lakh se zyada log is tabahi se mutasir hue hain aur rescue teams abhi bhi raste saaf karne aur madad pohanchane mein masroof hain. Sri Lankan President ne is storm ko mulk ki tareekh ka sab se bada aur sab se mushkil crisis qarar diya.
Reports Claim India May Offer Rapid Overflight Clearance After Backlash
Is tamam tanazur mein kuch media reports yeh bhi daawa kar rahi hain ke India ne shayad rapid overflight clearance dene ka faisla kar liya hai, lekin is bare mein abhi tak wazeh official tasdeeq maujood nahi. Filhaal ground reality yahi hai ke Pakistan ka relief mission airspace restrictions ki wajah se delay ka shikar hua, lekin Pakistan phir bhi Sri Lanka ke saath khara hai aur har qadam par insani madad jari rakhne ka iraada rakhta hai.