Samsung Galaxy users ke liye ek badi khabar, tayyar ho jaayein, kyunke jald hi tamam Galaxy smartphones ke daamon mein izafa dekhne ko mil sakta hai. Agar aap naye Samsung phone khareedne ka soch rahe hain, to yeh mauqa shayad sabse behtareen ho, kyunke company apne tamam Galaxy models ke daam barhane par ghour kar rahi hai.
Is izafay ki sabse badi wajah memory chips ke daamon mein lagataar izafa hai. Xiaomi ne bhi kuch din pehle apne phones ke prices barhane ka elan kiya tha isi wajah se. Reports ke mutabiq, Samsung bhi ab wohi raasta ikhtiyar kar sakta hai.
AI technology ke barhtay istemaal ki wajah se DRAM (Dynamic Random Access Memory) ki qeemat sirf ek mahine mein double ho gayi hai, aur experts ka kehna hai ke yeh “memory inflation” aglay teen saal tak jari reh sakta hai.
Apple ne bhi is saal iPhone 17 Pro ke daam barhaye hain, jisse yeh andaza lagaya ja raha tha ke Samsung bhi peechay nahi rahega aur ab lagta hai ke woh waqt aa gaya hai.
Agar Samsung aglay saal Galaxy S26 series ke daam same bhi rakhta hai, to 2027 tak unke phones mein qeematon ka izafa almost certain hai. Kyunke memory components phone ki total cost par directly asar dalte hain, Galaxy fans ko agli line-up mein noticeable price hike ka samna karna par sakta hai.