Wazir-e-Azam Shehbaz Sharif Saudi Wali Ahed aur Wazir-e-Azam Shahzada Mohammed bin Salman ki dawat par Riyadh ke rasmi daure par nikal gaye hain. Shehbaz Sharif Future Investment Initiative (FII) ke 9th edition mein Pakistan ki numaindagi karenge. Ye ahem conference 27 se 29 October tak Saudi Arab ke darul hukoomat Riyadh mein mun’aqid ho raha hai.
Wazir-e-Azam ke humrah Deputy Prime Minister aur Wazir-e-Kharja Ishaq Dar, federal cabinet ke senior arkaan aur dosray ahem officials bhi mojood hain. FII Conference 2025 ka theme hai “The Key to Prosperity: Unveiling the New Frontiers of Growth”, jahan duniya bhar ke leaders, investors aur policymakers shamil ho rahe hain.
Daure ke duran Shehbaz Sharif Saudi qiyadat ke saath tijarat, energy, manpower aur nayi investment opportunities par guftagu karenge. Iske ilawa, wo mukhtalif mumalik ke rehnumaon aur international organizations ke heads se bhi mulaqat karenge, jahan Pakistan ke investment potential aur sustainable development initiatives ko ubhara jayega.
Foreign Office ke mutabiq, ye daura Pakistan ki economic diplomacy ko mazid mazboot banane ka hissa hai, jiska maqsad foreign investment barhana aur mulk ke liye naye taraqqi ke raaste kholna hai.