UN Security Council ne America ke draft ki hui resolution ko adopt kar liya hai, jo former US President Donald Trump ke Gaza peace plan ko endorse karta hai. Is resolution ke zariye Gaza mein aik international stabilisation force deploy karne ki bhi ijazat de di gayi hai jiska maqsad ceasefire ko stable rakhna, area ko demilitarise karna, aur militant infrastructure ko khatam karna hoga.
Ye development tab samne aayi hai jab pichle mahine Israel aur Hamas ne Trump ke 20-point plan ke pehle phase yani ceasefire aur hostage-release deal par initial agreement kia tha. UNSC ki approval ko isliye bhi ahmiyat di ja rahi hai kyunke ye transitional governance body ko legitimacy deti hai aur un mulkon ko assurance deti hai jo Gaza mein troops bhejne par ghour kar rahe hain.
Resolution ke mutabiq, member states ab “Board of Peace” ka hissa ban sakti hain ek aisi temporary authority jo Gaza ki reconstruction, economic recovery aur governance transition ko oversee karegi.
International stabilization force ko Gaza ko demilitarise karne ka mandate diya gaya hai, jisme weapons ka decommission karna aur military infrastructure ko dismantle karna shamil hoga.
Hamas ka Sakht Rad-e-Amal
Hamas ne resolution ko foran reject kar diya. Group ne kaha ke woh disarm nahi hoga aur apni difa or muzahamat ko “jaiz” samajhta hai. Hamas ka kehna hai ke ye resolution Gaza par “international guardianship” thopta hai, jise woh aur unki awaam qabool nahi kar sakti.
America ka Response
US ambassador to the UN, Mike Waltz, ne council ko bataya ke ye resolution Palestinian self-determination ki taraf aik “mumkin rasta” paish karta hai, jahan jang aur rockets ki jagah political dialogue aur aman ka mauqa paida ho sakta hai. Unke mutabiq, plan ka maqsad Hamas ka influence kam karna aur Gaza ko “terror se azaad aur maqbool mustaqbil ki taraf le jaana” hai.
Russia aur China ka Ihtiyat Pasand Ravayya
Russia aur China dono ne veto istemal nahi kia, lekin vote se abstain kiya. Dono ne shikayat ki ke resolution UN ke role ko clear nahi karta, balkay America ko Gaza ke future governance par bohot zyada control de deta hai. Russian ambassador Nebenzya ne kaha ke council aik aise plan ko endorse kar raha hai jiske tamam parameters abhi tak wazeh nahi hain, aur jisse Gaza par US-led management system thopne ka impression milta hai.
Palestinian Authority ka Reaction
Palestinian Authority ne resolution ko welcome kiya aur kaha ke woh iski implementation mein hissa lene ke liye tayaar hai. Diplomats ke mutabiq, PA ka support Russia ke veto ko rokne mein aham factor tha.
Israel ki Concern aur Political Pressure
Resolution ka woh hissa jis mein future Palestinian statehood ka zikr hai, Israel mein bohot controversial sabit hua. Prime Minister Netanyahu jo apni right-wing coalition ke pressure mein hain, unhone dobara kaha ke Israel Palestinian state ko oppose karta hai. Unka kehna tha ke Gaza ko “asani se ya sakhti se” demilitarise karna hoga.
Ek Tareekhi Vote, Magar Bohat Se Sawaal Baqi
Trump ne UNSC ke vote ko “historic” qarar diya aur kaha ke Board of Peace ki membership aur key announcements jald kiye jayenge. Is resolution ko supporters ek naya diplomatic chapter keh rahe hain, jabke critics ka maanna hai ke Gaza par international force bhejna conflict ko aur complex bana sakta hai, khas taur par jab Hamas ne isay mukammal tor par reject kar diya hai. Filhal, UNSC ki approval ne peace roadmap ko aik naya diplomatic push diya hai, lekin implementation, governance transition, aur on-ground acceptance abhi bhi sabse bada challenge hai.
