US President Donald Trump ne South Korea ke Busan sheher mein Chinese President Xi Jinping se mulaqat ke baad elan kiya hai ke wo China se aane wale imports par tariffs kam kar rahe hain. Trump ne kaha ke ye qadam is liye uthaya gaya kyun ke Xi Jinping ne fentanyl ke ghair qanooni flow ko rokne ke liye ahd kiya hai.
Trump ne reporters ko bataya ke fentanyl se related China par lagai gayi 20% tariff ab 10% tak kam kar di gayi hai, jis se total tariffs 57% se 47% ho gayi hain. Unhone ye bhi kaha ke US aur China ke darmiyan ek saal ka trade agreement hua hai jismein Beijing ne rare earth minerals par restrictions na lagane ka waada kiya hai. Ye minerals computer chips, smartphones, AI systems, aur defense technology mein istemal hote hain.
Trump ne wazahat ki ke is US-China trade deal se China par lag sakti additional 100% tariffs ka khatra khatam ho gaya hai. Unhone reporters ko bataya, “Ab hamare paas deal hai. Har saal hum is deal ko renegotiate karenge, lekin mujhe lagta hai ke ye deal lambi chalegi.” Unhone ye bhi kaha ke fentanyl ke flow ko rokne ke liye China ne bohat mehnat karne ka ahd kiya hai.
President Trump ne kaha ke mulaqat mein zyadatar bilateral trade aur security cooperation par baat hui aur “bohat se decisions liye gaye.” Unhone is mulaqat ko “amazing” qarar diya aur rating scale par 12 mein se 12 number diye. Dono leaders ne ye bhi agree kiya ke Trump April mein China ka daura karenge, aur Xi baad mein US ka official visit karenge. Ye qadam dono mumalik ke darmiyan trade aur technology partnership ko mazboot karne ka signal hai, jismein rare earth minerals, AI systems, aur narcotics control jaise aham masail shamil hain.